હિંગળાજથી કપડવંજ સુધી

માં હિંગળાજ અને મૂળ શક્તિપીઠ

હિંગળાજ માતાનું મૂળ મંદિર પાકિસ્તાનના બલુચિસ્તાન પ્રાંતમાં, હિંગોળ નદી પાસેની એક ગુફામાં આવેલું છે. પરંપરા મુજબ અહીં સતીના મસ્તકનો ભાગ પડ્યો હતો, તેથી આ સ્થાન 51 શક્તિપીઠોમાં વિશેષ માનવામાં આવે છે.

દર વર્ષે એપ્રિલમાં ત્યાં હિંગળાજ યાત્રા યોજાય છે અને લાખો ભક્તો દર્શને આવે છે. પરંતુ ભારતના ભક્તો માટે ત્યાં જવું ખૂબ મુશ્કેલ છે. અનેક સમાજો માં હિંગળાજને કુળદેવી તરીકે પૂજે છે.

શોભના માંની યાત્રા

અમદાવાદના માઈભક્ત મફતલાલ મહારાજના આશીર્વાદથી શોભના માંએ સંત જીવન અપનાવ્યું. 22 ઑક્ટોબર 2010ના રોજ તેઓ 11 માઈભક્તો સાથે પાકિસ્તાનના હિંગળાજ ધામની યાત્રાએ ગયાં.

ત્યાંના દર્શન અને ભક્તિભાવથી તેમણે સંકલ્પ કર્યો કે માંનું આવું જ ધામ ગુજરાતમાં બને, જેથી અહીંના ભક્તો પણ માંના દર્શનનો લાભ લઈ શકે.

ધામનું નિર્માણ

અનેક સ્થળો જોયા પછી કપડવંજ પાસે વાત્રક નદીના કાંઠે, ઉત્કંઠેશ્વર મહાદેવ અને કેદારેશ્વર મહાદેવ જેવાં પ્રાચીન ધામો નજીક માંનું સ્થાન નક્કી થયું.

2015માં શિલાન્યાસ થયો. મૂળ હિંગળાજની જેમ ધામ ગુફા સ્વરૂપે બનાવવામાં આવ્યું છે: મંદિર એક ટેકરી (ડુંગર) પર છે અને માંના દર્શન ભૂગર્ભ ગુફામાંથી થાય છે.

પ્રાણ પ્રતિષ્ઠા મહોત્સવ

ફાગણ સુદ એકમથી ત્રીજ (16 થી 18 ફેબ્રુઆરી 2018) દરમિયાન આચાર્ય રિતેશભાઈ રાવલના માર્ગદર્શનમાં ત્રણ દિવસનો પ્રાણ પ્રતિષ્ઠા મહોત્સવ યોજાયો. ત્યારથી દર વર્ષે ફાગણ સુદ ત્રીજે પાટોત્સવ ઉજવાય છે.

• પહેલો દિવસ (16 ફેબ્રુઆરી): ગામમાં નગરયાત્રા, મંડપ પ્રવેશ અને અગ્નિ સ્થાપન.
• બીજો દિવસ (17 ફેબ્રુઆરી): 1008 કળશથી માંનો મહા અભિષેક અને અધિવાસ વિધિ.
• ત્રીજો દિવસ (18 ફેબ્રુઆરી): વેદોક્ત મંત્રો સાથે નિજ મંદિરમાં માં હિંગળાજની પ્રતિષ્ઠા.

અખંડ જ્યોત અને હિંગળાજનો પ્રસાદ

બલુચિસ્તાનના મૂળ હિંગળાજ ધામથી માંની અખંડ જ્યોત અહીં લાવવામાં આવી છે. સાથે ત્યાંથી પ્રસાદ રૂપે ઠૂમરો અને યંત્ર પણ લાવવામાં આવ્યાં, જે ગુફામાં સ્થાપિત છે. ધામમાં પંચધાતુનું શ્રીયંત્ર પણ બિરાજમાન છે.

આજે ધામમાં

ધામમાં નિત્ય પૂજા અને આરતી શોભના માં અને પૂજારી જતીન મહારાજ કરે છે. ધામ દ્વારા ગૌશાળા અને આશ્રમ પણ ચાલે છે.

ધામમાં બિરાજમાન દેવી-દેવતાઓ

સમાચારમાં